Kryeministri Edi Rama ka reaguar sërish lidhur me protestën e zhvilluar një ditë më parë në Zvërnec kundër projektit të ndërtimit në zonë, duke publikuar në rrjetet sociale foto nga tubimi dhe një mesazh ironik drejtuar protestuesve. Në reagimin e tij, Rama iu referua pjesëmarrësve si “revolucionarë”, ndërsa kërkoi që në vizitat e ardhshme në zonë të shmangin lëvizjen me makina pranë habitatit të flamingove.
“MIRËMËNGJES ? dhe me një lutje të përulur revolucionarëve, që kur të shkojnë herë tjetër në atë breg për t’u qarë hallin flamingove, të mos i bëjnë për të qarë duke ua zhvirgjëruar plazhin me makinat e tyre”, shkruan Rama.
Kreu i qeverisë ironizoi më tej duke shtuar se prania e automjeteve mund të trembë shpendët, duke bërë paralelizëm me largimin e tyre në të kaluarën.
"Se do kujtojnë të shkretët zogj se filloi ndërtimi i parkimit aty, e do marrin arratinë siç e kishin marrë përpara moratoriumit 10-vjeçar të gjuetisë”, vijon reagimi.
Rama u bëri thirrje protestuesve që automjetet t’i lënë larg zonës bregdetare dhe të ecin në këmbë deri pranë detit, ndërsa i akuzoi edhe për ndotje të ambientit.
“Po t’i lënë rrotat tek rruga automobilistike e të ecin si flamingo deri tek buza e detit pa u trembur nga papastërtitë, por mundësisht pa i shtuar ato si dje që i kishin lënë mbrapa kanoçet e birrës”, shkruan ai.
