Deputetja e Partisë Demokratike, Jorida Tabaku, ka reaguar pas njoftimit se në listën e projekteve të miratuara nga Korporata e Investimeve Shqiptare është përfshirë edhe ndërtimi i një kulle pranë Pallatit të Kongreseve.
Përmes një videoje të publikuar në rrjetet sociale, Tabaku u shpreh se debati nuk lidhet me nostalgjinë ndaj objekteve të së shkuarës, por me mbrojtjen e interesit publik dhe mënyrën sesi merren vendimet për administrimin e pronave shtetërore.
Sipas saj, Korporata e Investimeve Shqiptare është shndërruar në një institucion që vepron pa kontroll të mjaftueshëm, pa auditim dhe pa transparencën e nevojshme publike, ndërsa merr në administrim prona publike dhe vendos për zhvillimin e tyre pa një proces të qartë llogaridhënieje.
Deputetja demokrate argumentoi se rasti i Pallatit të Kongreseve nuk është i izoluar, por pjesë e një modeli më të gjerë, që sipas saj është evidentuar edhe në projekte të tjera, si ato në Zvërnec, Aeroportin e Vlorës dhe Portin e Durrësit. Në të gjitha këto raste, tha ajo, pasuria publike po trajtohet si pronë e një pakice, ndërsa qytetarët mbeten jashtë procesit të vendimmarrjes.
Tabaku e lidhi këtë fenomen me atë që e cilësoi si një sistem të përqendrimit të ekonomisë dhe pasurisë në pak duar, duke theksuar se mungesa e konkurrencës, transparencës dhe meritokracisë po ndikon negativisht në zhvillimin ekonomik të vendit.
Në fund, ajo theksoi se Shqipëria ka nevojë për një ekonomi të hapur, të bazuar në konkurrencë të ndershme dhe rregulla të barabarta për të gjithë, ku pasuria publike të administrohet në funksion të interesit të qytetarëve dhe jo të grupeve të privilegjuara.
