Një protestë kundër ndërtimeve në zonën e Dalanit në Zvërnec është shoqëruar këtë të shtunë me tensione dhe përplasje mes protestuesve dhe personave që, sipas tyre, janë punonjës të sigurisë private të angazhuar nga kompanitë që do të ndërtojnë në këtë zonë.
Në protestë morën pjesë aktivistë të mjedisit dhe përfaqësues të Lëvizjes Bashkë, të cilët kundërshtojnë projektet ndërtimore që po avancojnë në një prej zonave më të ndjeshme ekologjike të bregdetit shqiptar. Protestuesit pretendojnë se ndërhyrjet rrezikojnë ekuilibrat natyrorë të zonës dhe dëmtojnë një territor me rëndësi të veçantë për biodiversitetin dhe peizazhin natyror.
Gjatë protestës u regjistruan momente tensioni, kur protestuesit u përballën me persona që ata i identifikuan si pjesë të sigurisë private të kompanive ndërtuese. Ndërkohë, në zonën e rrethuar ku po zhvillohen punimet kishte edhe prani të forcave të policisë.
Aktivistët kërkojnë ndërprerjen e punimeve dhe rishikimin e projekteve që po zbatohen në Dalan, duke argumentuar se zhvillimi ekonomik nuk mund të bëhet në kurriz të një prej pasurive natyrore më të rëndësishme të jugut të vendit.
