Partia Demokratike ka nisur këtë të shtunë punimet e Kuvendit Kombëtar, një mbledhje e rëndësishme që zhvillohet menjëherë pas rizgjedhjes së Sali Berishës në krye të forcës politike. Berisha u konfirmua si kryetar i PD-së në një garë pa kundërshtarë.
Punimet e Kuvendit nisën në orën 11:33 dhe u hapën nga Erisa Bajaziti, shqiptare që jeton në Bruksel dhe kandidate e Partisë Demokratike për diasporën në zgjedhjet e fundit parlamentare.
Në fillim të mbledhjes, delegatët miratuan organet drejtuese të Kuvendit. Komisioni i Drejtimit të Punimeve do të kryesohet nga Ivi Kaso, me anëtarë Floriana Garon, Bardh Spahinë, Nada Meçorapajn dhe Eliona Shkrelin. Ndërkohë, Komisioni i Verifikimit të Mandateve dhe Kuorumit përbëhet nga Marash Logu, Adriana Kalaja dhe Ledio Nuraj.
Po ashtu, Kuvendi miratoi edhe Komisionin përgjegjës për votimet dhe zgjedhjet, i kryesuar nga Gazment Bardhi, me anëtarë Eda Grinçin dhe Eno Bozdon.
Gjatë punimeve u përcollën mesazhe përshëndetëse nga disa personalitete ndërkombëtare, mes tyre kryeministri i Kroacisë, ish-kongresmeni amerikan dhe përfaqësues i Partisë Republikane Bob McEwen, sekretarja e përgjithshme e Partive Popullore Europiane dhe eurodeputetja Dolors Montserrat, deputeti i parlamentit grek Vassilios Giogiakas, si dhe ish-deputeti i CDU-së gjermane, Volkmar Klein.
Ndërkohë është publikuar edhe lista zyrtare e kandidatëve për Këshillin Kombëtar të Partisë Demokratike, organi më i lartë vendimmarrës mes dy kuvendeve. Në garë janë përfshirë një sërë ish-deputetësh dhe drejtuesish demokratë me kontribute ndër vite, mes tyre Dhurata Çupi, Genc Pollo, Ardian Turku, Bedri Hoxha, Asllan Dogjani, Oerd Bylykbashi, Gjok Vuksani, Petrit Doda, Roland Keta dhe Adriana Gjonaj.
Mes kandidatëve spikat edhe emri i reperit Arkimed Lushaj, i njohur si Stresi, si dhe avokati Jordan Daci. Për një mandat në Këshillin Kombëtar kandidon gjithashtu edhe Juela Meçani, ish-zëdhënëse e Sali Berishës.
Nga radhët e Forumit Rinor të Partisë Demokratike kandidojnë edhe Glauk Olldashi, djali i ish-deputetit Sokol Olldashi, si dhe Azem Hajdari, djali i liderit të Lëvizjes Studentore dhe figurës historike të PD-së, Azem Hajdari. Forumi i Gruas dhe Forumi Rinor do të kenë kuota të garantuara përfaqësimi në strukturën e re drejtuese.
Kuvendi pritet të zgjedhë rreth 200 anëtarë të Këshillit Kombëtar, ndërsa fokusi i reformave statutore do të jetë forcimi i përfaqësimit të diasporës dhe grave, si dhe krijimi i strukturave të reja për përzgjedhjen e kandidatëve në proceset zgjedhore.
Një tjetër pikë e rëndësishme e rendit të ditës është paraqitja e tetë ndryshimeve statutore nga kreu i grupit parlamentar të PD-së, Gazment Bardhi. Ndryshimet parashikojnë krijimin e një komisioni të posaçëm që do të filtrojë dhe seleksionojë kandidaturat përpara se ato t’i nënshtrohen votimit nga anëtarësia, duke sjellë një rol më të kufizuar të primareve në përzgjedhjen e kandidatëve për deputetë dhe kryetarë bashkish.
