Reperi Arkimed Lushaj, i njohur me emrin artistik Stresi, është shfaqur nën praninë e babait të tij dhe njerëzve të afërt në Pallatin e Kongreseve pasi do të kandidojë për t’u bërë pjesë e Këshillit Kombëtar të PD.
Gjatë punimeve të Kuvendit do të diskutohen dhe miratohen ndryshimet statutore, ndërsa delegatët do të votojnë edhe për përbërjen e re të Këshillit Kombëtar.
Ndryshe nga praktikat e mëparshme, Partia Demokratike ka vendosur të mos publikojë listën e kandidatëve për këtë forum drejtues. Sipas burimeve nga selia blu, lista u është shpërndarë degëve dhe delegatëve, por nuk është bërë publike për mediat, me argumentin se kështu shmangen lobimet dhe tensionet e mundshme mes kandidatëve gjatë procesit zgjedhor.
Këshilli Kombëtar konsiderohet një nga strukturat më të rëndësishme drejtuese të Partisë Demokratike dhe anëtarët e tij zgjidhen nga delegatët e Kuvendit Kombëtar.
