Kryeministri Edi Rama mori pjesë këtë të enjte në aktivitetin për 35-vjetorin e Partisë Socialiste në Korçë, ku në fjalën e tij u ndal te historia e socialistëve, përplasjet politike të viteve ’90 dhe rruga që sipas tij ka ndjekur PS në raport me vendin dhe integrimin europian.
Rama kujtoi ngjarjet e 26 majit 1996, duke i cilësuar si një moment dramatik për demokracinë shqiptare dhe për opozitën e asaj kohe. Sipas tij, socialistët përballeshin me dhunë, presion dhe një regjim brutal politik.
“Kjo ishte një sfidë shumë më e madhe sesa kur u përmbys diktatura. PS ishte në një situatë dramatike. Opozita dhunohej rregullisht dhe nuk kishte hapësirë në media”, tha Rama gjatë fjalës së tij.
Më tej, kreu i qeverisë tha se Partia Socialiste është e vetmja forcë politike që ka qenë e drejtë me interesin kombëtar dhe me të ardhmen europiane të vendit.
“Pas një periudhe të gjatë vështirësish dhe denigrimi, ne i kemi ngritur kokën Shqipërisë dhe i kemi dhënë emrit të saj një tingëllim tjetër nga sa kishte disa vite më parë”, deklaroi Rama.
Ai u ndal edhe te procesi i integrimit europian, duke thënë se pavarësisht kritikave apo sulmeve politike, socialistët do të vazhdojnë rrugën drejt anëtarësimit në Bashkimin Europian.
“Ne themi atë që bëjmë dhe bëjmë atë që themi”, u shpreh Rama në mbyllje të fjalës së tij.
