Një ditë më parë, “Reporterët pa Kufij” reaguan ndaj deklaratave të kryeministrit Edi Rama mbi lirinë e medias në Shqipëri, të cilat ai i kishte mbështetur në një analizë të gjeneruar nga një startup i inteligjencës artificiale, ku pretendohej se opozita kishte një dominim më të madh në hapësirën mediatike.
Organizata ndërkombëtare i kërkoi kreut të qeverisë që të përqendrojë vëmendjen te problemet reale të lirisë së shtypit në vend, duke theksuar gatishmërinë për dialog dhe bashkëpunim me institucionet shqiptare. Në reagimin e saj, RSF nënvizoi se është e hapur për diskutim mbi rekomandimet e saj me palët lokale.
Në përgjigje, kryeministri Rama e cilësoi të habitshëm qëndrimin e organizatës ndaj të dhënave të paraqitura, duke sqaruar se qëllimi i tij nuk ishte kundërshtimi i “Reporterëve pa Kufij”, por sjellja në vëmendje e fakteve dhe analizave që, sipas tij, tregojnë se Shqipëria nuk mund të konsiderohet një vend me “media të kapura”.
Rama u shpreh gjithashtu i gatshëm për një takim dhe dialog me organizatën, duke propozuar caktimin e një date dhe vendi për diskutim. Ai theksoi se kërkimi i së vërtetës duhet të mbetet prioritet mbi çdo paragjykim apo përfundim të nxituar, duke rikonfirmuar se mbetet i hapur për bashkëpunim dhe për shkëmbim të mëtejshëm të të dhënave.
