Komisioni i Posaçëm për Reformën Territoriale zhvilloi këtë të enjte një mbledhje me praninë e kryebashkiakëve të qarkut të Beratit, të cilët shprehën qëndrimet dhe shqetësimet e tyre lidhur me ndarjen aktuale administrative dhe mundësinë e ndryshimeve të reja territoriale.
Kryetarja e Bashkisë Dimal, Juliana Memaj, u shpreh se bashki me karakter rural, si ajo që drejton, duhet të mbeten më të vogla për të garantuar shërbime efikase dhe për të mos lënë pas dore zonat rurale.
Sipas saj, reforma territoriale e vitit 2014 kishte si synim krijimin e bashkive me qendra urbane, por në disa raste kjo ka sjellë humbje të vëmendjes ndaj komuniteteve rurale.
Nga ana tjetër, kryebashkiaku i Kuçovës, Kreshnik Hajdari, deklaroi se pjesa më e madhe e territorit të bashkisë funksionon natyrshëm në kuadër të ndarjes aktuale administrative. Ai ndaloi veçanërisht tek ish-komuna Lumas, për të cilën tha se historikisht ka pasur lidhje më të forta me Beratin, por prej viteve ’90 banorët e saj kanë krijuar lidhje më të ngushta me Kuçovën.
Hajdari theksoi se ruajtja e Lumasit brenda Bashkisë Kuçovë nuk përbën problem në aspektin funksional, ndërsa shtoi se diskutimet mund të bëhen vetëm në terma administrativë dhe jo historikë.
Kritika më të forta ndaj reformës dhe komisionit shprehu kryebashkiaku i Poliçanit, Adriatik Zotkaj, i cili kërkoi që të merren në konsideratë problemet reale të qytetarëve dhe jo vetëm treguesit numerikë.
Ai paralajmëroi se një shkrirje e mundshme e Bashkisë Poliçan do të sillte pasoja të rënda ekonomike dhe sociale për zonën, duke rrezikuar vendet e punës dhe bizneset lokale.
Zotkaj akuzoi gjithashtu qeverinë për kufizim të kompetencave të kryetarëve të bashkive, duke deklaruar se pushteti vendor po humbet gradualisht funksionet kryesore dhe përfaqësimin real përballë qytetarëve.
Debati për reformën territoriale pritet të vijojë edhe në javët në vazhdim, ndërsa komisioni po zhvillon konsultime me përfaqësues vendorë në qarqe të ndryshme të vendit.
