Kryetari i Partisë Demokratike, Sali Berisha, reagoi ashpër ndaj dekorimit të Bardhyl Agasit nga kryeministri Edi Rama në Durrës, duke e cilësuar aktin si një “fyerje” për qytetarët dhe një mesazh të drejtpërdrejtë ndaj drejtësisë.
Në reagimin e tij, Berisha deklaron se Rama “dekoroi me pompë dhe salltanet” babanë e Ergys Agasit, të cilin ai e akuzon si figurë të lidhur me grupe kriminale dhe afera korruptive.
Sipas Berishës, dekorimi i Bardhyl Agasit nuk është një vlerësim qytetar, por një formë legjitimimi publik të njerëzve që, sipas tij, janë të lidhur me krimin e organizuar dhe korrupsionin shtetëror.
Ai pretendon se përmes këtij akti, Rama po dërgon një sinjal ndaj prokurorisë që të mos hetojë pasuritë dhe lidhjet e familjes Agasi.
“Kjo dekoratë u thotë qytetarëve se elitë bëhesh vetëm kur je mafioz”, shkruan Berisha, duke e cilësuar dekorimin si “poshtërim për qytetarët e Durrësit dhe për çdo socialist të ndershëm”.
Berisha shton më tej se Rama e ka ndërmarrë këtë akt sepse, sipas tij, “është peng i krimeve dhe dosjeve” që pretendon se disponohen nga Ergys Agasi.
