Procesi gjyqësor ndaj kryebashkiakut të Tiranës, Erion Veliaj, nisi sërish nga e para këtë të hënë në Gjykatën e Posaçme kundër Korrupsionit dhe Krimit të Organizuar, pas ndarjes së çështjes nga disa prej të pandehurve për të cilët u pranua gjykimi i shkurtuar.
Në hyrje të seancës, trupa gjykuese përbëhej nga kryetarja Elsa Ulliri dhe anëtarët Besmir Stroka e Flora Hajredini. Në nisje të seancës, gjykata rrëzoi kërkesën e mediave për transmetimin live të procesit, me argumentin se një transmetim i tillë do të cenonte mbarëvajtjen e gjykimit.
Vetë kryebashkiaku Veliaj nuk ishte i pranishëm në seancë, ndërsa mbrohej nga avokati Plarent Ndreca.
Gjatë relatimit të palëve, gjykata konstatoi se mungonin avokatët e disa prej të pandehurve, çka pamundësonte zhvillimin e gjykimit.
Në këto kushte, SPAK kërkoi pezullimin e afateve të paraburgimit, duke argumentuar se shtyrja e procesit po shkaktohej nga mungesa e mbrojtësve ligjorë.
Kërkesa u kundërshtua nga mbrojtja e kryebashkiakut Veliaj. Avokati i tij deklaroi se Veliaj nuk është shkak për shtyrjen e seancës dhe se nuk ka arsye për pezullimin e afateve të paraburgimit.
Megjithatë, pretendimet e tij nuk u morën në konsideratë nga GJKKO. Seanca u shty për në datën 10 qershor, ndërsa u vendos pezullimi i afateve të paraburgimit për Erion Veliajn. Kryebashkiaku akuzohet për 13 vepra penale, si korrupsion, pastrim parash, fshehje pasurie apo shpërdorim detyre.
