Pas vendimit të Gjykatës së Lartë që hoqi një nga pengesat ligjore për vijimin e punimeve në Aeroportin e Vlorës, fokusi i qeverisë është zhvendosur menjëherë nga çështja gjyqësore te marrëdhëniet mes vetë ortakëve të projektit.
Vetëm pas këtij zhvillimi, Ministria e Infrastrukturës ka reaguar më konkretisht mbi situatën në terren, duke identifikuar si problem kryesor jo më aspektin juridik, por konfliktin mes kompanive “MABCO” dhe “2A”.
Ministri Enea Karakaçi u ka dërguar një ultimatum të prerë palëve, duke u kërkuar që brenda 30 ditësh të zgjidhin mosmarrëveshjet e brendshme, në të kundërt projekti rrezikon të përballet me pasoja administrative.
Në dokumentin zyrtar theksohet se një investim i shpallur me rëndësi kombëtare nuk mund të mbahet peng i konflikteve private mes ortakëve, duke e vënë theksin te nevoja për zhbllokim të menjëhershëm të situatës.
Megjithatë, ajo që bie në sy është vonesa e reagimit të ministrit Karakaçi. Ndërhyrja vjen vetëm pasi u mbyll një kapitull gjyqesh dhe përplasjesh në terren.
Tashmë mbetet të shihet nëse afati 30-ditor do të mjaftojë për të zbutur përplasjet mes aksionerëve dhe për të kthyer projektin në ritmin e ndërtimit, apo nëse Aeroporti i Vlorës do të vazhdojë të mbetet i bllokuar mes dokumenteve dhe mosmarrëveshjeve dhe reagimeve periodike të ministrisë.
