Mbledhja e Këshillit Bashkiak të Maliqit ka nxjerrë në pah një qëndrim që bashkon demokratë dhe socialistë në nivel lokal: kundërshtimin ndaj propozimit për shkrirjen e Bashkisë së Maliqit me Korçën.
Mbledhja, e thirrur nga opozita për të mbajtur një qëndrim zyrtar të Këshillit Bashkiak mbi propozimin, është shoqëruar me tensione dhe përplasje mes këshilltarëve të opozitës dhe kryetarit të Bashkisë së Maliqit, Gëzim Topçiu.
Këshilltarët socialistë e kanë braktisur mbledhjen pas pak minutash, duke argumentuar se nevojitet më shumë informacion mbi propozimin përpara se Këshilli të marrë një vendim. Megjithatë, edhe nga radhët e socialistëve lokalë janë shfaqur rezerva ndaj idesë së shkrirjes së Maliqit me Korçën.
Në mbledhje kanë hyrë edhe qytetarë, të cilët kanë kërkuar shpjegime nga kryetari i Bashkisë së Maliqit, Gëzim Topçiu.
Të pranishëm kanë qenë edhe disa deputetë të opozitës, të cilët kanë kundërshtuar propozimin, me argumentin se shkrirja e Maliqit me Korçën do t’i largonte shërbimet nga qytetarët, veçanërisht nga banorët e zonave që ndodhen në distancë të konsiderueshme nga Korça.
Debati për reformën territoriale ka krijuar kështu në Maliq një situatë të pazakontë politike, ku demokratë dhe socialistë lokalë shfaqin rezerva ndaj një propozimi që vjen nga mazhoranca.
