Nga atentati i dështuar në mes të ditës në Elbasan, te incidenti në Sarandë dhe shpërthimi me tritol në banesën e Ylli Zallës, Sali Berisha i renditi ngjarjet e fundit si dëshmi e një situatë alarmante të rendit dhe sigurisë në vend.
Në një konferencë me gazetarët, kreu i Partisë Demokratike deklaroi se Shqipëria është “totalisht në duart e krimit”, ndërsa ngriti akuza të forta ndaj Policisë së Shtetit dhe ministrit të Brendshëm, Besfort Lamallari.
Berisha u ndal veçanërisht te rasti i Ylli Zallës, duke akuzuar Lamallarin se ka mashtruar qytetarët për mënyrën se si i shumëkërkuari përfundoi në duart e policisë.
Sipas tij, Zalla nuk është arrestuar, por është dorëzuar vetë, pasi më herët kishte dalë publikisht pranë banesës së dëmtuar nga shpërthimi dhe kishte ngritur akuza ndaj policisë.
“Lamallari mashtron qytetarët, thotë se e arrestuan, ndërkohë Zalla u dorëzua vetë. Se si mund të ketë dorëzim tjetër se sa të dalë në konferencë shtypi, vetëm mendja bosh e Lamallarit mund ta cilësojë arrestim. Ai u dorëzua”, deklaroi Berisha.
Kreu i PD-së komentoi gjithashtu ngjarjen në Elbasan, ku një person tentoi të qëllonte me armë një 50-vjeçar në ambientet e jashtme të një lokali.
“Në Elbasan, siç e patë ju, ditën për drekë, para kamerave, para gjithë qytetarëve, vrasësi i vendos pas kokës tytën e revoles viktimës, pa asnjë lloj hezitimi apo shqetësimi”, tha ai.
Duke iu referuar edhe incidentit në Sarandë, Berisha deklaroi se ngjarjet e ditëve të fundit tregojnë, sipas tij, se institucionet përgjegjëse nuk po arrijnë të garantojnë rendin dhe sigurinë
