Kreu i Partisë Demokratike, Sali Berisha, ka ndërhyrë publikisht në debatin për protestën, duke marrë në mbrojtje grupimin që qëndron pas lëvizjes dhe duke u bërë thirrje demokratëve që t’i bashkohen asaj, por pa përdorur logot partiake.
Në një deklaratë për mediat, Berisha e cilësoi protestën si një “lëvizje paqësore rinore qytetare” dhe akuzoi qeverinë se po përpiqet ta godasë atë përmes njerëzve të lidhur me Tom Doshin.
“Bandat e Edi Ramës, nëpërmjet Tom Doshit, sulmojnë flamingot, sulmojnë protestuesit paqësorë”, deklaroi Berisha.
Kreu i PD-së iu drejtua drejtpërdrejt edhe Doshit, duke e akuzuar se po përdoret nga kryeministri Edi Rama.
“I rikujtoj Tom Doshit se ai është përdorur si mish për top më 21 janar dhe të heqë dorë nga keqpërdorimi si mercenar i Edi Ramës”, tha Berisha.
Por deklarata e tij shkoi përtej mbrojtjes së protestuesve. Berisha u bëri thirrje hapur mbështetësve të Partisë Demokratike që të përfshihen në lëvizje, me kusht që pjesëmarrja e tyre të jetë si qytetarë dhe jo nën siglën e PD-së.
“PD dënon me forcën më të madhe çdo ndërhyrje të Edi Ramës ndaj lëvizjes paqësore rinore qytetare më të fuqishme që vendi ka njohur që nga vitet ’90 dhe u bën thirrje demokratëve të bëjnë çdo përpjekje për të marrë pjesë në këtë lëvizje si qytetarë jashtë logove partiake, në interesin më të mirë të vendit”, deklaroi ai.
Me këtë qëndrim, Berisha jo vetëm pozicionohet publikisht në mbrojtje të grupimit dhe protestës, por kërkon edhe përfshirjen e demokratëve në të, duke tentuar njëkohësisht të ruajë karakterin e deklaruar jopartiak të lëvizjes.
