Rreth orës 10:00 të ditës së sotme, në Gjykatën e Rrethit Gjyqësor Fier janë paraqitur për t’u njohur me masën e sigurisë Klajdi dhe Gerald Kapllanaj, nipër të ish-kryebashkiakut të Mallakastrës, Agron Kapllanaj, si dhe punonjësi i kompanisë “Shkëlqimi 07”, Gerald Kollçaku.
Tre të pandehurit akuzohen për veprën penale “Goditja për shkak të detyrës”. Sipas dëshmisë së dhënë në polici, ata kanë pohuar se nuk e dinin që personat që parkuan pranë mjediseve të kompanisë ishin agjentë të BKH-së dhe, nëse do ta kishin ditur, nuk do të ishin sjellë në atë mënyrë. Seanca po zhvillohet nën drejtimin e trupit gjykues të përbërë nga gjyqtari Alfred Konomi, prokurori Petrit Vukaj dhe avokati Niko Bega. Pritet që gjykata të vendosë mbi masën e sigurisë për tre të pandehurit në orët në vijim.
