Ish-presidenti i Kosovës, Hashim Thaçi, ka përcjellë një mesazh nga Haga, duke shprehur bindjen se në përfundim të procesit gjyqësor do të dalë i pastër nga akuzat e ngritura ndaj tij.
Përmes një postimi në rrjetin social Facebook, Thaçi u është drejtuar qytetarëve dhe mbështetësve të tij, duke shprehur dëshirën për t’i takuar dhe falënderuar personalisht për mbështetjen gjatë kësaj periudhe.
“Dua t’ju shtrëngoj dorën secilit nga ju, t’ju përqafoj të gjithëve dhe t’ju siguroj se do të dalë me çdo qelizë time të pastër si loti në fund të këtij rrugëtimi, që vazhdon me ju dhe për ju!”, shkruan Thaçi.
Mesazhi i ish-presidentit vjen në një kohë kur procesi gjyqësor ndaj tij dhe ish-drejtuesve të tjerë të Ushtrisë Çlirimtare të Kosovës vijon të mbetet në qendër të vëmendjes publike.
Në shtator të këtij viti, Dhomat e Specializuara të Kosovës në Hagë shpallën vendimin ndaj katër ish-krerëve të UÇK-së. Hashim Thaçi u dënua me 25 vite burg, Kadri Veseli me 18 vite, Rexhep Selimi me 13 vite dhe Jakup Krasniqi me 25 vite burg.
Katër ish-drejtuesit u shpallën fajtorë për krime lufte gjatë konfliktit në Kosovë, ndërsa u deklaruan të pafajshëm për akuzat që lidheshin me krime kundër njerëzimit.
