“Nga sot dimë se djali ynë u vra nga njerëz të rrezikshëm”. Kështu është shprehur Maria Marzocca, nëna e Francesco Diviestit, 26-vjeçarit nga Barleta e Italisë, i vrarë një vit më parë, pas arrestimit të autorëve të dyshuar në një operacion të përbashkët të antimafias italiane dhe SPAK-ut shqiptar, të mbështetur nga Eurojust.
“Për ne kjo është përgjigjja e shtetit që prisnim prej një viti”, tha ajo, ndërsa shprehu tronditjen pasi hetimet zbuluan lidhje me mafian shqiptare dhe trafikun ndërkombëtar të drogës. “Kam vetëm një pyetje: çfarë lidhjeje kishte djali im me këto rrethana?”, u shpreh nëna e të riut, duke theksuar se Francesco ishte i padënuar, punonte si parukier në biznesin e të atit dhe ishte vetë baba.
Avokati i familjes deklaroi se prindërit e 26-vjeçarit “nuk kërkojnë hakmarrje, por drejtësi dhe zbardhjen e plotë të së vërtetës”, ndërsa arrestimet i cilësoi vetëm si fillimin e procesit.
