Në vitin 2024, SPAK mori 70 kërkesa nga autoritetet gjyqësore të vendeve të ndryshme të BE-së për të dhënë ndihmësen e saj në hetime të ndryshme. Përmes letërporosive, autoritetet gjyqësore të vendeve të rajonit, BE-së apo vende të Amerikës Latine kanë kërkuar ndihmë për hetimin e veprave penale që lidhen me trafikun e drogës, pastrimit të parave, mashtrimit kompjuterik, apo krime të tjera të kryera në kuadër të grupit kriminal apo organizatës kriminale.
Përgjatë 2024 janë ekzekutuar 56 letërporosi, ndërkohë 14 prej tyre janë mbartur për ekzekutim në 2025. “Objekti i kërkesave për ndihmë juridike është kryerje e veprimeve të ndryshme hetimore në territorin e Repulikës së Shqipërisë për llogari të autoriteteve të huaja, kontrolli i ambjenteve apo sekuestrimi i pasurive të luajtshme apo të paluajtshme apo vlerave monetare cash.
60 kërkesa kanë patur objekt kryerjen e veprimeve të ndryshme hetimore; 7 kërkesa me objekt kontroll ambjentesh; 3 kërkesa me objekt sekuestrimin e pasurive”, thuhet në raportin e SPAK. Italia mban vendin e parë për numrin më të lartë për kërkesa për ndihmë juridike drejtuar SPAK, me 13 të tilla, pasuar nga Belgjika e Gjermania me nga 10 kërkesa, Franca 7 apo Holanda me 5 kërkesa. Ndërsa është kërkuar bashkëpunim nga SPAK edhe nga vende të Amerikës Latine.
