Ish-presidenti i Shteteve të Bashkuara, Joe Biden, ka lëshuar akuza të forta ndaj pasardhësit të tij, Donald Trump, për qasjen e tij ndaj luftës në Ukrainë dhe marrëdhëniet me Rusinë. Në një intervistë për BBC, Biden e akuzoi Trumpin se po ndjek një politikë moderne që “ledhaton Rusinë”, ndërsa po ushtron presion të padrejtë ndaj Ukrainës.
Sipas Biden, qëndrimi i Trump për luftën në Europën Lindore përbën një kërcënim për sigurinë globale dhe tradhton vlerat që Perëndimi ka mbrojtur prej dekadash. Ish-kreu i Shtëpisë së Bardhë tha se Vladimir Putin beson ende se Ukraina është pjesë e Rusisë dhe se çdo përpjekje për t’i dhënë territor si pjesë e një marrëveshjeje paqeje është një iluzion i rrezikshëm.
Joe Biden – Ish-President i SHBA:
“Shikoni, mjafton të shihni deklaratën e Putinit kur ai nisi pushtimin e Ukrainës. Ai nuk e duron dot faktin që diktatura ruse që ai drejton, që Bashkimi Sovjetik është shembur. Kushdo që mendon se Putin do të ndalet me lëshimin e territoreve është thjesht një budalla.”
Gjatë intervistës, Biden shprehu shqetësimin se Europa po humbet besimin në udhëheqjen amerikane, ndërsa theksoi se themelimi i NATO-s ka qenë investimi më i mirë i bërë ndonjëherë pas Luftës së Dytë Botërore. Ai shtoi se Shtetet e Bashkuara janë vendi i vetëm që ka fuqinë t’i bashkojë kombet përmes diplomacisë drejt një bote më të sigurt dhe më të drejtë.
Ndërkohë, Rusia dhe Ukraina vijuan këtë të mërkurë sulmet e ndërsjella. Në Kiev, dy persona humbën jetën nga një sulm raketor rus, ndërsa dronët ukrainas goditën sërish zonën e Moskës, duke detyruar autoritetet të mbyllin përkohësisht katër aeroporte – vetëm dy ditë përpara paradës së përvitshme të Fitores në Rusi. Situata në fushëbetejë mbetet e tensionuar, ndërsa diplomacia ndërkombëtare përballet me sfida gjithnjë e më të mëdha.
