133 kardinalë nën moshën 80-vjeçare nga e mbarë bota u mblodhën këtë të mërkurë në Vatikan, në nisje të Konklavës për zgjedhjen e pasuesit të Papa Françeskut. Procesi demokratik më i fshehtë në mbarë botën nisi me meshën e orës 10 të mëngjesit, që u mbajt brenda Bazilikës së Shën Pjetrit, ndërsa mijëra besimtarë katolikë ishin mbledhur jashtë kësaj bazilike.
Konklava do të nisë në orën 16:45, me kardinalët që do të nisin procesionin nga Kapela e Shën Palit në Kapelën Sistine. Më pas, në orën 17:35, të gjithë kardinalët mbi moshën 80 vjeç do të largohen nga Kapela Sistine dhe brenda saj do të qëndrojnë vetëm 133 kardinalët që kanë të drejtë vote. Ky moment do të shënojë edhe fillimin e izolimit të kardinalëve dhe nisjen zyrtare të Konklavës.
Për të siguruar sekretin maksimal të Konklavës, Vatikani ka vendosur një kombinim të teknologjive të sigurisë së lartë dhe masave të rrepta fizike.
Masat e sigurisë përfshijnë filma specialë për dritaret, për të parandaluar regjistrimin nga dronët, si dhe sisteme bllokimi të sinjalit për telefonat celularë, të cilët gjithsesi janë të ndaluar gjatë Konklavës.
Në ditën e parë të Konklavës mbahet vetëm një raund votimi, por nëse nuk zgjidhet një Papë i ri, Konklava në ditët në vijim mund të mbajë deri në 4 raunde votimesh në ditë. Votat do të digjen në oxhakun e instaluar së fundmi në çatinë e Kapelës Sistine: tym i zi për zgjedhjet e dështuara, tym i bardhë për një Papë të ri.
Kreu i Zyrës së Shtypit të Vatikanit, Matteo Bruni, tha sot se tymi i parë pritet të dalë nga oxhaku i Kapelës Sistine rreth orës 19:00. Kardinalët qëndrojnë në shtëpinë e mysafirëve Santa Marta, e cila u evakuua ditët e fundit për t’u kontrolluar plotësisht nga forcat e sigurisë. Kardinalët do të shoqërohen nga policia e Vatikanit dhe Garda Zvicerane kudo që të lëvizin.
Po ashtu, si masë sigurie është vendosur edhe një kordon mbrojtës rreth kardinalëve në çdo kohë. Edhe nëse duan të bëjnë një shëtitje ose të pinë duhan në kopsht, askush nuk do të jetë në gjendje t’u afrohet.
Asistentët, përfshirë priftërinjtë, kuzhinierët, shoferët, pastruesit dhe ndihmësit, kanë bërë tashmë një betim për sekret absolut dhe të përjetshëm. Shkelja e betimit sjell përjashtim automatik nga Kisha.
