George Simion, kandidati ultranacionalist dhe euroskeptik, ka fituar bindshëm raundin e parë të zgjedhjeve presidenciale në Rumani, duke siguruar 40.9% të votave. Megjithatë, rezultati nuk mjaftoi për të shmangur një balotazh, që do të mbahet më 18 maj, ku Simion do të përballet me kryebashkiakun liberal të Bukureshtit, Nicușor Dan, i cili u rendit i dyti me pak më pak se 21%.
Simion, 38 vjeç, udhëheq partinë “Aleanca për Bashkimin e Rumunëve” dhe është një mbështetës i deklaruar i presidentit amerikan Donald Trump. Ai është shprehur kundër ndihmës ushtarake për Ukrainën dhe ka një qëndrim skeptik ndaj Bashkimit Evropian, megjithatë mbështet fuqishëm një NATO të fortë dhe praninë e trupave amerikane në Rumani.
Zgjedhjet e 4 majit erdhën pas një skandali të madh elektoral gjashtë muaj më parë, kur fitorja e kandidatit radikal Calin Georgescu u anulua për shkak të akuzave për manipulim dhe ndërhyrje ruse. Georgescu u përjashtua nga gara e përsëritur, ndërsa një pjesë e madhe e elektoratit të tij duket se ka kaluar në mbështetje të Simionit.
Pas shpalljes së rezultateve paraprake, Simion e quajti votën e qytetarëve “një akt guximi, besimi dhe solidariteti”, duke theksuar se këto zgjedhje nuk kishin të bënin me individë, por me “çdo rumun që është mashtruar, injoruar dhe poshtëruar, por ende ka forcë të besojë dhe të mbrojë identitetin dhe të drejtat tona”.
Ndërkohë, rivali i tij në balotazh, Nicușor Dan, shihet si një alternativë më e moderuar dhe pro-evropiane. Ai gëzon mbështetje të gjerë në zonat urbane dhe te diaspora rumune, faktorë që mund të jenë vendimtarë në raundin e dytë.
Procesi zgjedhor po ndiqet me vëmendje nga Bashkimi Evropian, Shtetet e Bashkuara dhe Ukraina, për shkak të rolit strategjik të Rumanisë si vend tranziti për ndihmat ushtarake drejt Ukrainës dhe si një aleate kyçe në krahun lindor të NATO-s. Ekspertët e sigurisë paralajmërojnë se një fitore e Simionit mund të sjellë ndryshime të thella në politikën e jashtme dhe atë të mbrojtjes së Rumanisë.
