Protesta e 19-të qytetare për dorëheqjen e kryeministrit Edi Rama ka nisur këtë të enjte me një intinerar të ndryshuar nga ditët e mëparshme. Qytetarët e mbledhur fillimisht në sheshin “Skënderbej” u drejtuan drejt godinës së Kuvendit të Shqipërisë, ku po zhvillohej seanca plenare dhe ku ishte i pranishëm edhe kryeministri Edi Rama.
Ndryshe nga protestat e ditëve të kaluara, kur marshimi përfundonte përpara Kryeministrisë, protestuesit vendosën t’i drejtohen Parlamentit, pikërisht në kohën kur deputetët po shqyrtonin dhe votonin amnistinë penale dhe disa projektligje të tjera që kërkojnë shumicë të cilësuar.
Para godinës së Kuvendit u dëgjuan thirrje si “Dorëzoni mandatet!”, “Poshtë qeveria!” dhe “Rama jep dorëheqjen!”, ndërsa protestuesit shprehën pakënaqësinë e tyre jo vetëm ndaj mazhorancës, por ndaj gjithë klasës politike. “Rama në burg, Berisha në burg” dhe “Parlament i krimit” ishin disa nga sloganet që u përsëritën nga qytetarët, teksa deputetët po largoheshin nga seanca plenare.
Në seancën e kësaj të enjteje mori pjesë kryeministri Edi Rama, ndërsa deputetët e Partisë Demokratike munguan pa bërë asnjë njoftim publik për arsyet e bojkotit të seancës.
Pas qëndrimit përpara Kuvendit, protesta vijoi me marshimin drejt godinës së Kryeministrisë. Gjatë rrugës, protestuesit u ndalën edhe para selisë së Partisë Demokratike, ku hodhën parulla si “Opozitë e shitur” dhe “Rama në burg, Berisha në burg”.
Kalimi para selisë blu u shoqërua edhe me një moment tensioni. Thirrjet e protestuesve shkaktuan debate me persona të pranishëm pranë godinës së PD-së dhe për disa çaste situata u tensionua, ndërsa përplasja verbale për pak sa nuk degjeneroi në konfrontim fizik.
Më pas, marshimi vijoi drejt Kryeministrisë, ku protestuesit vazhduan thirrjet për dorëheqjen e kryeministrit dhe ndryshime politike. Kjo është dita e 19-të radhazi e protestave qytetare në Tiranë, të cilat kanë nisur pas kundërshtimeve ndaj projektit turistik në zonën e mbrojtur të Pishë-Poros dhe janë shndërruar gradualisht në një lëvizje me kërkesa të qarta politike kundër qeverisë.
