Kuvendi miratoi këtë të enjte me 84 vota pro ligjin për amnistinë penale, në një seancë të zhvilluar pa praninë e deputetëve të Partisë Demokratike, të cilët bojkotuan punimet pas përplasjeve të ndodhura më herët gjatë ditës.
Në nisje të seancës, ministri i Drejtësisë, Toni Gogu, deklaroi se nga amnistia do të përfitojnë menjëherë 466 persona që do të lirohen nga burgjet, mes tyre 11 gra dhe 1 i mitur. Ndërkohë, për 869 persona të tjerë do të ketë ulje dënimi, përfshirë 8 gra dhe 8 të mitur. Sipas ministrit, asnjë person dhe asnjë vepër penale që është nën juridiksionin e SPAK nuk përfitojnë nga amnistia.
Nga ligji do të përfitojnë burrat e dënuar me vendim të formës së prerë deri në 3 vite burg ose atyre që u kanë mbetur për të vuajtur deri në 3 vite dënim deri më 31 maj 2026. Për gratë, kufiri është 4 vite burg, çka do të sjellë lirimin e menjëhershëm të tyre nëse plotësojnë kushtet e parashikuara.
Pas bojkotit të opozitës, mazhoranca arriti të sigurojë e vetme 84 votat e nevojshme për miratimin e ligjit. Në momentin e votimit mungonin ish-zëvendëskryeministrja Belinda Balluku dhe deputetja Marjana Koçeku.
