Ditën e sotme është zhvilluar mbledhja e Komisionit Hetimor për trajtimin e të dhënave të sistemit TIMS, ku dëshmuan ministri i Brendshëm, Taulant Balla, drejtori i Përgjithshëm i Policisë Muhamet Rrumbullaku, dhe drejtuesi i Departamentit të IT, Ervin Muça.
I pari që u mor në pyetje për 3 orë me rradhë ishte ministri Balla, ndërsa seanca u zhvillua me dyer të mbyllura, pasi ministri i Brendshëm, ka deklaruar se ka informacione të klasifikuara. Në këtë mbledhje ishin vetëm deputetët që kanë certifikata sigurie, duke hedhur poshtë kërkesën e Salianjit për të pasur një seancë publike.
Pas Ballës ishte rradha e drejtorit të Përgjithshëm të Policisë së Shtetit, Muhamet Rrumbullaku. Kërkesës së Salianjit që seanca me Rrumbullakun të zhvillohej me dyer të hapura, nuk iu përgjigjën depuetët e PS, të cilët pas disa përplasjesh me kreun e Komisionit, vendosën në shumicë votash që marrja në pyetje të vijonte me dyer të mbyllura.
Ndërsa vet Rrumbullaku u shpreh se përgjigjet e tij do ishin në varësi të zhvillimit të Komisionit, nëse do zhvillohej publikisht do fliste vetëm për informacione që nuk ishin të klasifikuara.
