Gjykata e Beratit ka shpallur moskompetencë territoriale për çështjen ndaj kreut të Agjencisë së Mbikëqyrjes Policore (AMP), Florian Sulejmani, i akuzuar për shpërdorim detyre. Gjyqtari Ilirjan Hysi vendosi që çështja t’i kalojë Gjykatës së Tiranës, por la në fuqi pezullimin e Sulejmanit nga detyra.
Ai akuzohet se ka ndërhyrë në mënyrë të paligjshme në transferimin e oficerëve të policisë gjyqësore gjatë një hetimi në Berat, në kundërshtim me ligjin për funksionimin e Policisë Gjyqësore dhe atë të AMP-së.
Sipas prokurorisë, ekzistojnë dyshime të arsyeshme dhe rrethana që rrezikojnë vërtetësinë e provave, ndaj masa e pezullimit konsiderohet e nevojshme dhe e përshtatshme.
