Një ngjarje e rëndë është shënuar këtë të premte në ambientet e aeroportit të Vlorës, ku një punëtor 38-vjeçar ka humbur jetën si pasojë e një aksidenti gjatë punës.
Sipas informacionit paraprak nga policia, ngjarja ka ndodhur rreth orës 15:40, kur shtetasi D. H., 38 vjeç, dyshohet se është rrëzuar aksidentalisht nga lartësia, gjatë kryerjes së punimeve në terminalin e aeroportit. Fatkeqësisht, ai ka ndërruar jetë në vendngjarje.
Menjëherë pas ngjarjes, në vend kanë mbërritur forcat e policisë dhe grupi hetimor, i cili ka nisur veprimet për zbardhjen e plotë të rrethanave të aksidentit tragjik.
