Dy shtetas shqiptarë, të shpallur në kërkim ndërkombëtar nga autoritetet italiane, janë arrestuar në kuadër të operacionit të koduar “Operacionalja”.
Arrestimi i parë u krye në Fushë-Krujë, ndërsa i dyti në Dibër. Sipas Policisë së Shtetit, të dy personat konsiderohen me rrezikshmëri të lartë shoqërore dhe janë të dyshuar për përfshirje në organizata kriminale, trafikim të lëndëve narkotike, shfrytëzim prostitucioni dhe vjedhje të rëndë.
Në kuadër të fazës “Operacionalja 39”, forcat operacionale bënë të mundur lokalizimin dhe arrestimin e shtetasit Klodian Llomi (i njohur edhe si Mazari), 34 vjeç, banues në Maqellarë, Dibër. Gjykata e Apelit në Romë, Itali, e ka dënuar këtë shtetas në vitin 2023 me 6 vjet, 7 muaj e 2 ditë burg, për veprat penale: “Organizatë kriminale”, “Trafikim i lëndëve narkotike” dhe “Shfrytëzim prostitucioni”, sipas Kodit Penal Italian.
Ndërkohë, në fazën “Operacionalja 40”, u arrestua në Laç shtetasi Roland Ibrahimi, i njohur edhe me emrin Ali Meci, 40 vjeç. Ky shtetas është dënuar nga Gjykata e Torinos në vitin 2024 me 4 vjet e 3 muaj burg, për veprat penale: “Organizatë kriminale”, “Grup kriminal” dhe “Vjedhje e rëndë”, gjithashtu sipas Kodit Penal Italian.
Të dy të arrestuarit pritet të ekstradohen drejt Italisë.
