Bordi i Entit Rregullator të Energjisë (ERE) ka vendosur sot uljen e çmimit të energjisë elektrike për konsumatorët familjarë. Pas propozimit të Operatorit të Shpërndarjes së Energjisë Elektrike (OSHEE), çmimi për familjet që konsumojnë deri në 700 kilovat/orë do të ulet nga 9.5 lekë në 8.5 lekë për kilovat/orë.
Për familjet që shpenzojnë mbi 700 kilovat/orë, çmimi do të mbetet 9.5 lekë për kilovat/orë, ndërsa me TVSH do të arrijë në 11.4 lekë. Ky vendim do të hyjë në fuqi në muajin shkurt të vitit 2025 dhe do të zgjasë deri më 31 dhjetor 2025.
Sipas drejtorit të Tarifave të OSHEE-së, ky ndryshim synon të ndihmojë familjet që konsumojnë më pak energji elektrike, ndërkohë që çmimet për konsumatorët e tjerë, përfshirë bizneset dhe institucionet, mbeten të pandryshuara.
“Propozuam që për konsumatorët familjarë që shpenzojnë deri në 700 kilovat/orë çmimi të jetë 8.5 lekë, ndërsa për ata që shpenzojnë më shumë, çmimi të mbetet 9.5 lekë për kilovat/orë. Ky ndryshim prek vetëm kategorinë e konsumatorëve familjarë,” tha drejtori i Tarifave.
Ky vendim pritet të sjellë një lehtësim të ndjeshëm për familjet shqiptare, duke i inkurajuar ato për një konsum më të kursyer dhe më të përgjegjshëm të energjisë elektrike.
