Prej së premtes mbi 200 punonjës të industrisë Fason në Krujë janë në protestë. Punonjësit kërkojnë të drejtat e tyre që burojnë nga ligjet shqiptare, e konkretisht Kodi i Punës. Qytetarët krutanë punonjës të firmës Altek kërkojnë respektimin e Kontratës e Punës, sepse edhe pse me paga të ulta po shfrytëzohen për të dhënë të njëjtin prodhim me fuqi punëtore të përgjysmuar. Sipas punonjësve, nëse kjo nuk ndodh dhe shfaqin pakënaqësi, punonjësit kërcënohen me largim nga puna. Tjetër kërkesë e punonjësve është dhe respektimi i vjetërsisë së punës duke qenë se kanë mbi 20 vite që punojnë dhe nuk iu shtohet paga edhe kjo detyrim që buron nga ligjet shqiptare edhe pse firma është italiane. Duke qënë se pagat e pumonjësve të industrisë Fasone e konkretisht në rastin konkret tek Altek janë të ulta punonjësit kërkojnë dhënien e pagës së 13-të duke qenë se bëjnë një punë relativisht të madhe përgjatë gjithë vitit fitimprurëse për firmën. Burime nga protesta e fasonëve, bëjnë me dije se Zyra e Punës në këtë qytet jo vetëm nuk i ka mbështetur por ii ka bërë presion për rikthimin në punë.
