Flobenc Meçja, një nga shtatë të arrestuarit gjatë operacionit policor të koduar “Enigma” në Durrës, së bashku me Xhevdet Plakun, i njohur si “Akili”, është një emër i njohur në botën e krimit.
Flobenc Meçja, i njohur edhe me nofkat “Gega” dhe “Drini”, ishte në kërkim nga SPAK për veprat penale “Organizatë kriminale”, “Kryerja e veprave penale nga grup i strukturuar kriminal” dhe “Sigurimi i kushteve dhe mjeteve për të kryer vrasje”.
Ai akuzohet si pjesë e organizatës kriminale të drejtuar nga vëllezërit Franc dhe Hajdar Çopja, të cilët janë në konflikt me grupin rival të Erion Alibejt, i njohur si “Krymi”.
Franc Çopja kishte ofruar deri në 5 milionë euro për vrasjen e Erion Alibejt, ndërsa nga 1 milion euro për vrasjen e shtetasve Arjan Spahiu, Aldo Baho dhe Ilir Lloshi. Flobenc Meçja kishte shprehur gatishmëri për të kryer të gjitha këto atentate.
Në një bisedë përmes aplikacionit të enkriptuar Sky ECC, Flobenc Meçja komunikon me Franc Çopjan, duke e pyetur: “Më thuaj pak a shumë ku rreh pazari, se unë nuk jam vetëm?” Franc Çopja i përgjigjet: “5 milionë euro.”
“Ti dashke me na nxjerrë në pension,” shprehet Flobenc Meçja.
