Një ngjarje e rëndë ka tronditur universitetin shtetëror të Floridës, ku dy persona humbën jetën dhe të paktën gjashtë të tjerë mbetën të plagosur si pasojë e një sulmi me armë zjarri.
Autori i dyshuar është një 20-vjeçar, djali i një zëvendës-sherife, i cili përdori armën e shërbimit të nënës së tij për të kryer sulmin. Sipas autoriteteve, i riu refuzoi të dorëzohej në momentin që policia mbërriti në vendngjarje, dhe për pasojë u qëllua nga një efektiv.
Dy viktimat, sipas policisë, nuk ishin studentë të universitetit, ndërsa autori besohet se ndiqte studimet në këtë institucion. Armën e kishte marrë në zyrën e nënës së tij, ku ajo kishte shërbyer për më shumë se 18 vite.
Sipas gazetës studentore, 20-vjeçari kishte marrë pjesë më herët në protestat në kampus kundër inaugurimit të Presidentit Donald Trump në janar. Ndërkohë, vetë presidenti është informuar për ngjarjen, por ka deklaruar se nuk do të ndryshojë ligjin për armët, pavarësisht tragjedisë.
Hetimet për zbardhjen e plotë të ngjarjes vijojnë.
