Protesta e opozitës poshtë kryeministrisë ka përfunduar pas 2 orësh, me fjalime të drejtuesve të saj dhe disa personazheve publik, ndërsa përplasjet ishin rezervuar për tek Bashkia e Tiranës. Me pankarta në duar ku kërkohej lirimi i kreut të PD, Sali Berisha, sulmet ndaj SPAK dhe akuzat për korrupsionin qeveritar, ishin kryefjala e këtij tubimi.
Fjalën e parë para protestuesve e hapi regjizori Edmond Budina, i cili në fokus vuri kauzën e teatrit dhe nëpërkëmbjen që i ka bërë qeveria qytetarëve.
Ndërsa kreu i PL, Ilir Meta, në fjalën e tij nuk harroi që të lëshojë breshëri sulmesh ndaj SPAK dhe drejtuesin e Prokurorisë së Posaçme, Altin Dumani duke e quajtur si shërbëtor të Ramës. Meta gjithashtu tha se është turp për ata opozitarë që i “bëjnë furçe SPAK-ut”.
Më pas fjalën e mori, kreu i PD, Sali Berisha, i cili ndër të tjera tha se nëse çmimi për të mbrojtur shqiptarët qenka një ‘non-grata’ dhe një arrest pa prova, do ta bëja prapë edhe 1000 herë të tjera, duke lënë të kuptohet se nuk e ka ndërmend që të tërhiqet nga politika. Ai gjithashtu u shpreh se Edi Rama e ka mbyllur ciklin e tij dhe se ai nuk do qeverisë dhe 4 vite të tjera.
Gjatë fjalës së tij, protestuesit hodhën disa molotov drejt kryeministrisë, duke e përmbyllur kështu tubimin poshtë zyrës së Ramës. Ndërsa një pjesë tjetër e molotovëve i kursyen për tek Bashkia e Tiranës, ku dhe u zhvendosën pas përfundimit të fjalës së Berishës. Protestuesit përcollën mesazhet e tyre dhe për kryetarin e Bashkisë, Erion Veliaj, ku nuk mungoi dhe përplasja me policinë.
Në protestë nuk munguan as fëmijët e liderit të PD, Shkëlzeni dhe Argita të cilët qëndruan largë tribunës. Ndërsa nga aleatët përveç Metës, ishte edhe Fatmir Mediu.
