Çuditërisht po në këtë ditë zhduket edhe instagrami i Erion Veliajt, i cili po ashtu është familjarisht në hetim pasuror nga SPAK. Me të drejtë lind pyetja: mos ndoshta Veliaj ka të njëjtat halle si Beqja dhe Kumbaro, me aktivitete të ngjashme të publikuara në instagram? (E ku tjetër)
Një hakerues kur vjedh llogarinë e dikujt që ka shumë ndjekës si në rastin e Veliajt e bën për një qëllim të caktuar. Ose e bën për qëllime përfitimi, siç ishte rasti i hakerimit të profilit të Kastriot Islamit ku u përdor për të mashtruar ndjekësit për bitcoin. Ose e bën për t’u hakmarrë duke postuar përmbajtje të pahijshme për të turpëruar profilin e hakeruar. Por rasti i Veliajt është unik. Sepse hakeruesi ka fshirë çdo postim. Dhe vështirë të besosh që dikush ka shpenzuar kohë dhe jo vetëm për t’u bërë fshesa me korrent e profilit të Veliajt.
Për më tepër kur bëhet fjalë për njeriun që ka një zyrë të posaçme me dhjetëra punonjës për menaxhimin e rrjeteve sociale dhe në disa raste e ka përdorur këtë zyrë për të sulmuar faqe që shkruajnë kundër tij. Edhe më e vështirë bëhet kur mendon që Acromax, xhandari i videove në rrjete sociale që kritikojnë kryebashkiakun, është 24 orë në 24 në shërbim të Veliajt.
