11 korriku është dita e përkujtimit të një prej masakrave më të mëdha të botës, siç është ajo e Srebrenicës. Çuditërisht, përveç ministrit të Jashtëm Igli Hasani që ka bërë një postim në facebook, asnjë nga drejtuesit e shtetit nuk e ka përkujtuar këtë ngjarje, që nga presidenti, kryeministri e deri tek drejtuesit e opozitës.
Për këtë masakër nuk ka reaguar as kreu i PDIU, Shpëtim Idrizi, i cili mbron të drejtat e çamëve që dhe ata qenë viktima të një genocidi.
I vetmi shtetar shqiptar që e ka përkujtuar në lartësinë e duhur, është kryeministri i Kosovës Albin Kurti, i cili përveçse organizoi konferencë të posaçme ditën e djeshme, sot në Kuvend miratuan edhe një deklaratë mbështetëse për rezolutën e Asamblesë së Përgjithshme të OKB.
Gjenocidi i Srebrenicës është një krim lufte i zbatuar nga ushtria Serbe në korrik të vitit 1995 në Bosnje dhe Hercegovinë, ku u vranë më shumë se 8,000 boshnjakë myslimanë, kryesisht burra dhe djem të moshës 12 deri 77 vjet. Asambleja e Përgjithshme e Kombeve të Bashkuara në 23 maj të këtij viti votoi rezolutën për shpalljen e 11 korrikut si dita ndërkombëtare kur Përkujtohen Viktimat e Gjenocidit në Srebrenicë.
Kjo rezolutë nuk u prit mirë nga presidenti i Serbisë, Aleksandër Vuçiç dhe nga serbët në tërrësi.
