Ndryshe nga çdo protestë e opozitës gjatë muajve të fundit, Argita Berisha nuk u shfaq mbrëmë para kryeministrisë. Vajza e Sali Berishës që kohët e fundit ka dominuar skenën opozitare me fjalimet në kuvendin e PD, intervistat televizive dhe pjesmarrjen në çdo protestë sado të vogël, mbrëmë “shkëlqeu” me mungesën e saj.
Krejt ndryshe nga sa ndodh zakonisht, Shkëlzen Berisha ishte mbrëmë jo vetëm prezent por dhe i disponueshëm për çdo gazetar të interesuar për ti marrë intervistë. Ndryshe nga sa është shfaqur deri më sot, disi diskret dhe i rrethuar nga miqtë e tij, mbrëmë në protestë Shkëlzen Berisha ishte i rrethuar nga bodyguard-ët, që jo rastësisht janë të njëjtët që mbronin Sali Berishën kur nuk ishte në arrest shtëpie. Kjo mund të jetë dhe rastësi, megjithatë familja e Sali Berishës dukshëm apo fshehtas prej dhjetra vitesh lëviz fijet brenda PD dhe Opozitës. Me gjasë popullariteti i ulët i Argita Berishës mund ta kenë detyruar babain e saj të mendojë që i biri të jetë pasuesi. Me lidhje më të gjata dhe më të përfolura me politikën, median dhe biznesin ndoshta kandidatura e Shkëlzen Berishës do të jetë më e pranueshme për demokratët.
Kur mendon pastaj se mes kujt duhet të zgjedhin shqiptarët, kjo pa dyshim është akt tjetët i dramës tonë 33 vjeçare në demokraci.
