Ish-kryeministri dhe ish-deputeti socialist Pandeli Majko ka zgjedhur përsëri që të shfaqet si "analist i gjeopolitikës rajonale", duke artikular një paralajmërim të ashpër ndaj presidentit të Serbisë, Aleksandër Vuçiç.
Në një reagim të gjatë publicistik, Majko është ndalur te deklaratat e fundit të liderit serb për ndryshimin e rrjedhës së lumit Ibër dhe lojën e tij me dy porta midis Kievit dhe Moskës.
Sipas Majkos, retorika e Vuçiçit mbi Ibrin reflekton mendësi nga periudha "përpara se qytetërimi të shkruante ligjet", ndërsa e quan strategjinë e tij tregtare e ushtarake një paradoks ku "nga një komb si ai serb shkojnë me qindra vullnetarë për të luftuar në krah të rusëve, ndërsa qeveria e tyre bën tregti armësh me Kievin".
Në përmbyllje të analizës së tij, ai nënvizon se "politika e ‘Aleksandrit të vogël’ të Serbisë është në një udhëkryq".
Por përtej vërtetësisë së kritikave ndaj Serbisë dhe krizës ku gjendet pushteti i Vuçiçit, deklarata e Majkos nxjerr në pah një kontradiktë të madhe politike: heshtjen e tij të gjatë e selektive për zhvillimet brenda Shqipërisë.
Ndërsa gjen energjinë dhe guximin për të disektuar deri në detaje vendimet e shtetit fqinj, Majko ka zgjedhur të mos thotë asnjë fjalë për krizat politike që mbërrijnë çdo ditë në dyqanin e qeverisë "Rama" ku ai ka shërbyer si shitës propagande. Asnjë qëndrim për aferat e korrupsionit madhor që kanë tronditur kabinetin socialist, asnjë koment për përplasjet institucionale apo protestat qytetare që kërkojnë llogaridhënie.
Kjo mospërputhje sjelljeje tregon qartë një taktikë të njohur në politikën vendase: shfrytëzimin e çështjeve kombëtare dhe figurës së Vuçiçit si një "rrufepritës" publik, për të shmangur përballjen me realitetin e brendshëm politik.
Për sa kohë vëmendja e opinionit publik orientohet te krizat dhe "mbreti lakuriq" në Beograd, Majko dhe kolegët e tij në Tiranë mund të vazhdojnë të mbyllin sytë përballë problemeve që kanë kapluar pushtetin e Edi Ramës.
