Partia Demokratike ka nisur mobilizimin e strukturave të saj në të gjithë vendin kundër projektit të qeverisë për ndryshimin e hartës administrativo-territoriale.
Përmes një udhëzimi të shpërndarë te degët lokale, selia blu u kërkon drejtuesve të saj të bashkëpunojnë me këshilltarët bashkiakë të të gjitha forcave politike që kundërshtojnë reduktimin e numrit të bashkive.
Në dokumentin e PD-së kërkohet bashkimi me çdo subjekt politik dhe grupim qytetar që është kundër reformës, me synimin për krijimin e një fronti të përbashkët dhe organizimin e protestave kundër propozimit të mazhorancës.
Demokratët pretendojnë se ndryshimet e propozuara cenojnë autonominë e pushtetit vendor dhe kërkojnë angazhimin e qytetarëve në zonat ku parashikohet shkrirja e bashkive.
Udhëzimi parashikon zhvillimin e takimeve urgjente me këshilltarët demokratë në nivel vendor, si dhe hartimin e një strategjie të koordinuar për kundërshtimin e reformës.
Nisma e Partisë Demokratike vjen në një periudhë kur reforma administrativo-territoriale ka shkaktuar debate në disa bashki të vendit, ku këshillat bashkiakë dhe komunitetet lokale kanë shprehur kundërshti ndaj ndryshimeve të propozuara.
