Senati i Shteteve të Bashkuara ka miratuar kandidaturën e Eric P. Wendt për postin e ambasadorit të SHBA-së në Shqipëri, duke i hapur rrugën emërimit të tij zyrtar në Tiranë.
Kandidatura e Wendt u miratua në seancën plenare të Senatit me 50 vota pro dhe 44 kundër, pasi kishte marrë më herët edhe mbështetjen e Komitetit për Marrëdhëniet me Jashtë.
Pas këtij votimi, mbetet vetëm formalizimi i emërimit nga presidenti Donald Trump. Më pas, Wendt pritet të mbërrijë në Shqipëri dhe të marrë zyrtarisht detyrën pasi të dorëzojë letrat kredenciale te Presidenti i Republikës.
Eric P. Wendt do të zëvendësojë Yuri Kim, e cila përfundoi mandatin e saj në vitin 2023. Që prej largimit të saj, Ambasada e SHBA-së në Tiranë është drejtuar nga të ngarkuar me punë, ndërsa procesi i emërimit të ambasadorit të ri u shty për shkak të procedurave të konfirmimit në Senatin amerikan.
Wendt është një ish-oficer i lartë i ushtrisë amerikane me mbi 30 vite eksperiencë, pjesën më të madhe të së cilës e ka kaluar në forcat speciale “Green Beret”. Ai ka drejtuar Komandën e Operacioneve Speciale të NATO-s dhe ka mbajtur poste të rëndësishme në fushën e sigurisë në Lindjen e Mesme dhe rajonin e Paqësorit.
Gjithashtu, ai ka shërbyer si koordinator i sigurisë së SHBA-së për Autoritetin Izraelito-Palestinez gjatë viteve 2017–2019 dhe si shef shtabi në Komandën e Paqësorit të SHBA-së. Wendt është diplomuar në Universitetin e Kalifornisë, Santa Barbara, ka kryer studime pasuniversitare në sigurinë kombëtare dhe flet disa gjuhë të huaja, përfshirë arabishten dhe koreanishten.
