Prokuroria e Fierit shpalli pretencën për dy të akuzuar për vrasje pas një sherri në rrjetet sociale.
Për shtetasin Florian Muka kërkoi deklarimin fajtor për kryerjen e veprës penale “Vrasja me paramendim”, e kryer në bashkëpunim, dhe dënimin e tij me 25 vjet burgim. Po ashtu, u kërkua deklarimi fajtor i të miturit Klajdi Muka për kryerjen e veprës penale “Vrasja me paramendim”, e kryer në bashkëpunim, dhe dënimi i tij me 12 vjet e 6 muaj burgim.
Ata akuzohen se vranë shtetasin Grei Bihuci pas një konflikti të nisur në rrjetet sociale.
Nga hetimet e kryera rezultoi e provuar se, më datë 11.03.2024, rreth orës 11:30, në lagjen “Kongresi i Përmetit” të qytetit të Fierit, gjatë një takimi për t’u sqaruar lidhur me një konflikt të ndodhur disa ditë më parë dhe të publikuar në rrjetet sociale, të pandehurit Florian dhe Klajdi Muka, të cilët kishin me vete armë të ftohta, në bashkëpunim me njëri-tjetrin kanë goditur viktimën Grei Bihuci, duke i shkaktuar atij vdekjen e menjëhershme.
