Policia e Shtetit ka zbardhur planin operacional për sezonin turistik 2025, duke vënë theksin te siguria, rendi dhe zbatimi i ligjit në çdo cep të zonave turistike të vendit. Me një organizim të gjerë, forca të shtuara në terren dhe teknologji moderne, uniformat blu kanë hyrë në një fazë intensive gatishmërie për t’iu përgjigjur fluksit të pushuesve dhe sfidave të verës.
Plani i masave: Siguri në plazhe, kufij dhe rrugë
Që prej 16 qershorit dhe deri më 15 shtator, Policia ka aktivizuar një plan të detajuar veprimi që përfshin:
- Forcimin e sigurisë në zonat bregdetare, liqenore dhe lumore;
- Menaxhimin e fluksit në pikat kufitare;
- Parandalimin e aksidenteve rrugore dhe krimit në zonat turistike;
- Zbatimin me përpikëri të orarit të ndalimit të muzikës;
- Mbrojtjen e mjedisit dhe lirimin e hapësirave publike.
Vetëm bregdeti me shërbim 12-orësh – Policia shton prezencën dhe logjistikën
Ndryshe nga viti i kaluar, shërbimi 12-orësh do të aplikohet vetëm në zonat bregdetare, ku fluksi është më i lartë. Në ndihmë të policive vendore janë angazhuar forca shtesë që do të paguhen sipas rregullores përkatëse.
Policia ka vënë në dispozicion:
- Dhjetëra automjete dhe motomjete për patrullime intensive;
- Punonjës me biçikleta që patrullojnë në plazhe për kontakt më të drejtpërdrejtë me qytetarët;
- Njësinë Policore Detare për kontrollin e mjeteve të rrezikshme lundruese;
- Dronë për monitorim në ajër të sigurisë në plazhe dhe akseve rrugore.
Kufiri, në mbikëqyrje të plotë – Shtim i sporteleve dhe kontrolleve
Në pikat kufitare janë shtuar sportelet dhe burimet njerëzore për të përballuar fluksin turistik. Po ashtu, janë intensifikuar kontrollet në kufirin e gjelbër dhe blu për të parandaluar kalimet e paligjshme dhe krimin ndërkufitar.
Rrugët nën “llupën” e teknologjisë – Shërbime 24/7 dhe testime në terren
Policia Rrugore do të operojë pa ndërprerje në të gjitha akset kombëtare dhe zonat e banuara, duke përdorur pajisje inteligjente, dronë dhe alkooltestues. Qëllimi është garantimi i lëvizjes së lirë dhe parandalimi i aksidenteve, sidomos në pikat e ngarkuara gjatë fundjavave dhe pushimeve.
Për këtë periudhë është vendosur dhe ndalimi i qarkullimit të mjeteve të rënda në fundjavë dhe festat zyrtare.
Operacioni “Plazh i Lirë” në vijim – Goditje ndaj zaptuesve të vijës bregdetare
Policia po vijon me operacionin “Plazh i Lirë” për lirimin e hapësirave të zaptuara në mënyrë të paligjshme në zonat bregdetare, duke ndërhyrë kudo ku është konstatuar shkelje. Kontrollet do të jenë të vazhdueshme edhe për respektimin e orarit të muzikës dhe nivelit të zhurmës, ku efektivët tashmë janë të pajisur me aparate matëse të specializuara.
Etikë dhe kontroll mbi vetë Policinë – Monitorim të shërbimeve në terren
Me urdhër të drejtpërdrejtë të Drejtorit të Përgjithshëm të Policisë së Shtetit, janë ngritur grupe të posaçme monitorimi për të siguruar që çdo punonjës policie të veprojë në përputhje me Kodin e Etikës dhe të ruajë standardin profesional në komunikim dhe ndërhyrje.
Thirrje qytetarëve: Denonconi çdo paligjshmëri
Policia e Shtetit garanton se mbetet në krye të detyrës për një sezon turistik të sigurt dhe civilizuar, duke ftuar qytetarët e vendit dhe turistët e huaj të bashkëpunojnë, të tregojnë kujdes dhe të raportojnë çdo rast të paligjshmërisë në numrin pa pagesë 112.
