Në një dokument konfidencial, Komisioni Europian ka informuar vendet anëtare për progresin e Shqipërisë në fushën e drejtësisë, me vlerësime pozitive për Prokurorinë e Posaçme Antikorrupsion (SPAK).
Sipas dokumentit, arrestimi i kryetarit të Bashkisë së Tiranës, Erion Veliaj, në shkurt të vitit 2025, është renditur ndër arritjet e institucionit. Ndërkohë, reagimet kritike të mazhorancës dhe kryeministrit Edi Rama janë cilësuar si përpjekje për të ushtruar presion ndaj drejtësisë, duke ngritur “shqetësime serioze” për pavarësinë e saj.
“Hetimi dhe arrestimi i një zyrtari të zgjedhur, i konfirmuar nga Gjykata e Posaçme, shkaktoi reagime të paprecedenta nga degët ekzekutive dhe legjislative, përfshirë përpjekje për presion ndaj SPAK-ut”, thuhet në dokument.
Komisioni evidenton gjithashtu mungesën e bashkëpunimit nga institucionet ligjzbatuese, veçanërisht në rastin e protestës së mbështetësve të Veliajt para SPAK, ku Policia e Shtetit nuk mori masa të mjaftueshme për sigurinë e prokurorëve, pavarësisht ankesave zyrtare të SPAK-ut.
Një tjetër çështje që kërkon vëmendje, sipas BE-së, është rinovimi i mandateve në sistemin e drejtësisë. Komisioni kërkon që emërimet në Gjykatën Kushtetuese dhe në strukturat e posaçme të bëhen në kohë dhe mbi bazë merite, për të shmangur krijimin e vakancave.
BE vlerëson gjithashtu kontributin e SPAK në luftën kundër krimit të organizuar dhe sekuestrimin e aseteve, duke e cilësuar këtë institucion si një nga pikat më të forta të progresit në drejtësi në Shqipëri.
