Gazetarja e njohur Klodiana Lala, e ftuar në emisionin “Të Paekspozuarit” në MCN TV, ka dhënë të tjera detaje për ecurinë e procesit gjyqësor ndaj kryetarit të Bashkisë së Tiranës, Erion Veliaj, i cili ndodhet në paraburgim prej muajit shkurt të këtij viti.
Lala tha se pritet që vendimi i Gjykatës së Lartë mbi masën e sigurisë ndaj Veliajt të jepet brenda muajit korrik. Sipas saj, bazuar në precedentët e mëparshëm të kësaj gjykate, ka pak gjasa që Veliaj të lirohet. Megjithatë, ajo theksoi se rasti i tij përmban një komponent ndryshe në raport me raste si ato të Sali Berishës apo Ilir Metës, të cilëve u është hequr masa, pasi Veliaj vijon të ushtrojë funksionin si kryetar bashkie.
“Veliaj ka ushtruar rekurs në Gjykatën e Lartë. Ai pretendon se nuk ekzistojnë kushtet dhe kriteret për masën e sigurisë. Pretendohet se nuk ka rrezik arratisjeje apo ndërhyrjeje në prova. Ai është në detyrë dhe kërkon të vazhdojë punën si kryebashkiak,” tha Lala.
Sipas saj, pasi është caktuar relatori i çështjes, pritet edhe përcaktimi i datës së seancës, ndërsa shtoi se çështja mund të shqyrtohet edhe në mungesë të palëve, një praktikë e ndjekur më parë edhe në rastin e Ilir Metës. Lala theksoi se gjyqtarja relatore është Albana Boksi, një emër me integritet që ka kaluar procesin e vettingut dhe ka ardhur nga Apeli i Krimeve të Rënda. Por, vendimi nuk merret nga një gjyqtar i vetëm – është një trup gjykues me tre anëtarë.
“Është e rëndësishme të shohim edhe gjyqtarët e tjerë të trupit. Në Apelin e Posaçëm ka patur dy seanca të rëndësishme, një prej të cilave zhvillohet nesër, për informacionin dy mujor. Në bazë të provave që do paraqesë SPAK, avokatët mund të kërkojnë zëvendësimin e masës së sigurisë. Kjo mbetet për t’u parë,” u shpreh Lala.
Sipas gazetares, dallimi kryesor i rastit Veliaj qëndron te fakti se ai vijon të jetë në detyrë, gjë që nuk ka ndodhur me ish-funksionarët e tjerë të lartë ndaj të cilëve janë zhvilluar hetime. “Në rastin e Berishës, Metës, Beqajt, nuk kishte detyrë funksionale. Këtu duhet parë nëse prevalon qëndrimi i prokurorisë, apo detyra e tij si kryetar bashkie. A janë provat kaq të forta sa e duan në burg? Apo mund të hetohet në gjendje të lirë dhe të ushtrojë funksionin?”, shtoi ajo.
Lala theksoi gjithashtu se deri më tani, Gjykata e Lartë nuk ka liruar asnjë të pandehur për vepra penale që lidhen me korrupsionin, çka e bën të vështirë edhe në rastin konkret. “Gjasat për t’u liruar janë të pakta, por i vetmi aspekt ndryshe është fakti që Veliaj është në detyrë – ky është edhe argumenti ku mbështeten avokatët e tij,” tha ajo.
Në lidhje me komunikimet e fundit të Veliajt në rrjetet sociale, veçanërisht në TikTok, gazetarja theksoi se nuk i sheh si mesazhe kërcënuese. “Veliaj nuk po paraqitet më në Gjykatën e Posaçme. Në raport me gjuhën e ashpër që kishte më parë – dhe që prokuroria e interpretonte si sulm të koordinuar – tani ai ka bërë një hap pas. Gjuha e tij është zbutur ndjeshëm. A mund të jetë një strategji e re për të sulmuar ata që i konsideron kundërshtarë? Kjo mbetet për t’u parë,” përfundoi Klodiana Lala.
