Drejtuesi i SPAK, Altin Dumani, gjatë Forumit të Kryeprokurorëve të mbajtur në Tiranë, theksoi se lufta kundër krimit të organizuar kërkon koordinim të ngushtë rajonal dhe ndërkombëtar. “Nuk na bashkon gjeografia, por lufta kundër krimit,” u shpreh Dumani, duke nënvizuar se grupet kriminale veprojnë përtej kufijve dhe për shpërbërjen e tyre nevojitet besim i ndërsjellë, ndarje informacioni dhe hetime të përbashkëta.
Ai vuri në dukje se bashkëpunimi me Eurojust ka qenë thelbësor për trajtimin e rasteve të ndërlikuara, ndërsa theksoi se SPAK po përballet me një fluks në rritje çështjesh. Vetëm në periudhën janar-maj, janë zhvilluar 10 mbledhje dhe janë ngritur 23 skuadra hetimore me vendet e BE-së dhe rajonit, si dhe një skuadër me Amerikën Latine.
Sipas Dumanit, hetimet financiare, rekuperimi i aseteve dhe ndarja e informacionit në kohë reale janë çelësi i suksesit në luftën kundër krimit të organizuar.
