Gjykata e Posaçme vendosi të lërë në fuqi masën e sigurisë arrest me burg për kryebashkiakun Erion Veliaj.
Avokati kërkoi zëvendësim të masës ose garanci pasurore me qëllim që Veliaj të lirohej, por gjykata nuk i mori në konsideratë.
SPAK ndërkohë informoi gjykatën se gjatë dy muajve të hetimit ka zbuluar se çifti Xoxa-Veliaj zotëron në mënyrë të përbashkët një apartament sipër banesës së tyre. Apartamenti ndërkohë u la nën sekuestro po ditën e sotme nga Apeli i Posaçëm.
Veliaj po hetohet bashkë me bashkëshorten Ajola Xoxa për korrupsion, pastrim parash dhe fshehje të pasurisë. Në hetim janë dhe gjashtë biznesmenë.
Njoftimi
1. Kërkuesi Prokuroria e Posaçme kundër Korrupsionit dhe Krimit të Organizuar
me datë 10.06.2025 ka paraqitur pranë Gjykatës kërkesën me objekt: “1. Informacion 2
(dy) mujor në lidhje me procedimin penal nr. 27, të vitit 2024; 2. Vazhdimin e zbatimit
të masës së sigurimit personal “arrest në burg”, parashikuar nga neni 238 i K.Pr.Penale,
caktuar ndaj shtetasit nën hetim Erion Veliaj dhe vazhdimin e zbatimit të masës së
sigurimit personal “arrest në shtëpi”
, parashikuar nga neni 237 i K.Pr.Penale, caktuar ndaj
shtetasit nën hetim Elman Abule.”.
2. Në përfundim të gjykimit, Gjykata e Posaçme e Shkallës së Parë për Korrupsionin dhe
Krimin e Organizuar me trup gjykues të përbërë nga gjyqtari Erjon Bani, bazuar në nenet
112, 246 dhe 260 të K.Pr.Penale, me vendimin Nr. 382, datë 17.06.2025, vendosi:
1. Vazhdimin e masës së sigurimit “Arrest në burg” parashikuar nga neni 238 i
K.Pr.Penale, caktuar ndaj personit nën hetim Erion Veliaj me vendimet Nr. 7,
datë 09.02.2025 dhe Nr. 14, datë 12.02.2025 të Gjykatës së Posaçme të Shkallës
së Parë për Korrupsionin dhe Krimin e Organizuar.
2. Vazhdimin e masës së sigurimit “Arrest në shtëpi” parashikuar nga neni 237 i
K.Pr.Penale, caktuar ndaj personit nën hetim Elman Abule me vendimin Nr. 13,
datë 13.03.2025 të Gjykatës së Posaçme të Apelit për Korrupsionin dhe Krimin e
Organizuar.
3. Ngarkohet Prokuroria e Posaçme kundër Korrupsionit dhe Krimit të Organizuar
në bashkëpunim me policinë gjyqësore për ekzekutimin e këtij vendimi.
4. Kundër këtij vendimi mund të bëhet ankim në Gjykatën e Posaҫme të Apelit për
Korrupsionin dhe Krimin e Organizuar brenda 5 (pesë) ditëve, duke filluar ky afat
nga e nesërmja e njoftimit të këtij vendimi.
