Arbër Paplekaj, i dënuar për vrasjen e Pjerin Xhuvanit më 21 prill 2021, katër ditë përpara zgjedhjeve parlamentare, kërkon liri me kusht në gjykatën e Durrësit. Lajmi konfirmohet nga burime pranë gjykatës, të cilat thanë se janë zhvilluar shtatë seanca. Burimet thanë se seanca e së martës u shty, pasi Paplekaj nuk ishte shoqëruar nga forcat e policisë së burgut. Kërkesa e Paplekajt po shqyrtohet nga gjyqtari Rexhep Bekteshi, ndërsa ai, përmes avokatit, ka renditur një sërë argumentesh mbi të cilat kërkon lirimin me kusht. Arbër Paplekaj u dënua nga Apeli i Juridiksionit të Përgjithshëm me 7 vite burgim për akuzën “vrasje e kryer në gjendje të tronditjes së fortë psikike”. Më herët, gjykata e Elbasanit e kishte dënuar me 22 vite burgim për “vrasje në rrethana të tjera cilësuese”. Ngjarja ndodhi më 21 prill 2021, kur grupi i mbështetësve të opozitës në Elbasan bllokoi një automjet pa targa, që drejtohej nga Mehmet Greca, i njohur me nofkën Met Dafllaku. Sipas tyre, personi i skeduar për trafik droge në Britaninë e Madhe, po vepronte për të blerë vota në favor të PS-së. Arjan Hoxha, që drejtonte atë që e konsideronin si strukturën e mbrojtjes së votave në PD, njoftoi policinë duke kërkuar ndërhyrjen e saj për ndalimin e Grecës, që e akuzonin për përfshirje në aktivitetin e shitblerjes së votës. Në vendngjarje, në ndihmë të Mehmet Grecës mbërriti Pjerin Xhuvani dhe disa persona të tjerë, të skeduar për krime të ndryshme, dhe u përplas me mbështetësit e PD-së. Në vendngjarje u përdorën tre pistoleta, me njërën prej të cilave qëlloi Paplekaj, duke lënë të vrarë Pjerin Xhuvanin, ish mjek psikiatër, dhe duke plagosur oficeren e policisë, Xhensila Sota. Vrasja ndodhi në praninë e dy zv.drejtorëve të policisë së Elbasanit dhe pjesëtarëve të grupit të gatshëm.
