Vetëm 9% e bonusit të bebeve u përdor në janar-prill, për shkak të rënies së lindjeve dhe ndryshimeve ligjore
Është ulur numri i bebeve që përfituan bonusin për periudhën janar-prill 2025, duke ndjekur tendencën rënëse të përfituesve nga viti në vit.
Sipas të dhënave të Raportit të Monitorimit të Treguesve Financiarë për vitin 2025, nga fondi prej 2,25 miliardë lekësh i vënë në dispozicion për bonusin e bebes, janë realizuar vetëm 8,8% e pagesave, duke mbuluar 6.940 lindje për periudhën janar-prill.
Ndërkohë, për vitin 2024, me një fond të ngjashëm prej 2,2 miliardë lekësh, u realizuan 27% e pagesave për 8.672 lindje. Nga këto, 6.985 përfitues të bonusit ishin për lindje brenda vendit dhe 1.687 bebe përfituese, ose 20% e tyre, ishin jashtë vendit.
Rënia e numrit të bebeve të lindura brenda vendit që përfituan bonusin për janar-prill 2025 është rreth 1% më pak krahasuar me të njëjtën periudhë të vitit 2024.
Të dhënat tregojnë një trend në rënie të bebeve përfituese që kanë lindur brenda vendit. Për janar-prill 2023, fondi i bonusit të bebes mbuloi pagesat për 11.707 lindje brenda vendit, ndërsa 5.107 prej tyre ishin për lindje jashtë vendit. Në total, numri i përfituesve ra me 4% krahasuar me të njëjtën periudhë të vitit 2022. Megjithatë, rreth 43% e përfituesve në vitin 2023 rezultuan të kishin lindur jashtë Shqipërisë.
Sipas të dhënave të INSTAT, për tremujorin e parë të vitit, në rang vendi, numri i lindjeve ishte 4.662. Krahasuar me të njëjtën periudhë të vitit 2024, numri i lindjeve ra me rreth 23%.
Ndërsa përfitimi nga totali i fondit të bonusit në masën 20%, 30% deri në 50% për bebet që lindnin jashtë vendit ka qenë një fenomen i qëndrueshëm që prej nisjes së programit në vitin 2019. Sipas Ministrisë së Shëndetësisë, në katër vitet 2019–2022 u shpërndanë 11,5 miliardë lekë për 161.943 bebe përfituese, nga të cilat rreth 33% kanë lindur jashtë Shqipërisë.
Bonusi i bebes, që ofron një shumë deri në 120.000 lekë për lindjen e fëmijës, deri në fund të vitit 2023 është përfituar edhe nga familjet shqiptare që jetojnë jashtë vendit, për sa kohë që fëmija regjistrohet në Shqipëri. Por, për shkak të përqindjes së lartë të përfituesve jashtë vendit dhe kufizimeve buxhetore, në maj të vitit 2023 Ministria e Shëndetësisë propozoi ndryshime ligjore për të përjashtuar nga përfitimi personat që nuk janë rezidentë në Shqipëri.
Ndryshimet në ligjin nr. 57/2019, “Për asistencën sociale në Republikën e Shqipërisë”, hynë në fuqi në nëntor 2023.
Ndërsa në muajin dhjetor 2023, me ndryshimet e miratuara në VKM-në “Për përcaktimin e masës dhe të procedurës së dhënies së ndihmës së menjëhershme financiare për foshnjat e porsalindura dhe mënyrën e bashkëpunimit ndërmjet institucioneve të shërbimit spitalor dhe atyre të gjendjes civile”, qeveria vendosi edhe një kusht të ri: që njëri prej prindërve, ose të dy, të kenë jetuar të paktën 180 ditë (rreth 6 muaj) brenda Shqipërisë gjatë vitit para lindjes së fëmijës, për të përfituar bonusin.
Të dhënat do të verifikohen nëpërmjet sistemit TIMS, i cili regjistron hyrje-daljet në Shqipëri nëpërmjet kufirit. Prindi, gjithashtu, duhet të plotësojë një formular vetëdeklarimi, ku konfirmon se jeton në Shqipëri.
Gjithashtu, kryeministri Edi Rama gjatë fushatës elektorale të muajit maj deklaroi se bonusi i bebes do të zëvendësohet me një skemë të re pagesash të menjëhershme, sipas numrit të fëmijëve dhe për periudha 2-, 3- apo 5-vjeçare.
