Drejtoria e Përgjithshme e Tatimeve ka nisur një hetim të gjerë ndaj 100 individëve dhe subjekteve të cilët dyshohet se kanë përfituar miliona euro nga platformat sociale, por nuk i kanë deklaruar ato. Bëhet fjalë për të ardhura të përfituara nga platformat më të përdorura si Facebook, TikTok, YouTube, Instagram, Google dhe PayPal.
Sipas verifikimeve paraprake të administratës tatimore, shifra e të ardhurave të padeklaruara dyshohet të arrijë rreth 33 milionë euro. Në deklaratën e shpërndarë për publikun, Tatimet theksojnë se më datë 29 mars kanë bërë një thirrje publike për vetëdeklarim në DIVA 2024, por shumë nga subjektet në fjalë nuk kanë reaguar.
Zyrtarët tatimorë paralajmërojnë se kush nuk ka kryer ende detyrimet fiskale do të përballet me penalitete dhe hetime të thelluara. Apeli është i qartë: vetëdeklarimi sa më parë është mënyra e vetme për të shmangur pasojat ligjore.
Njoftimi:
Drejtoria e Hetimit ka nisur hetimin ndaj 100 individëve/subjekteve për të ardhurat e përfituara nga platformat sociale (Facebook; TikTok; YouTube; Instagram; Google; PayPal), ku nga verifikimet paraprake dyshohet për rreth 33 milionë euro të padeklaruara.
Administrata Tatimore ka njoftuar më datë 29 mars, përmes rrjeteve sociale, që individët dhe subjektet të përmbushin detyrimet ligjore nëpërmjet vetëdeklarimit në DIVA 2024.
Ftojmë tatimpaguesit që nuk kanë reaguar ende, të kryejnë sa më shpejt këtë detyrim, për të shmangur penalitete dhe masa të tjera që mund të sjellë një hetim i thelluar.
