Uran Kostreci ishte një simbol i rezistencës pa kompromis ndaj komunizmit. Një poet romantik, me një shpirt të butë dhe të fortë njëkohësisht, që mbeti i palëkundur në idealet e tij për liri.
Përkujtohet jo vetëm për veprën e tij letrare, por edhe për kontributin që dha në ruajtjen e kujtesës historike.
Në një nga dëshmitë e tij ka thënë:
“Unë do ta falja diktaturën komuniste për vuajtjet e mia personale, por nuk e fal atë për vuajtjet që u bëri shqiptarëve.”
Urani ka jetuar në qytetin e Elbasanit, ku punoi si mësues i gjuhës shqipe pas mbarimit të shkollës Normale. Por si shpirt i lirë, nuk mundi të pajtohej me diktaturën: tentoi arratisjen nga liqeni i Pogradecit, nga ku u arrestua dhe u dënua me burg.
Nga dosja e tij e e krijuar nga ish -Sigurimi i Shtetit, mësojmë se edhe në burg ai protestonte, mbante greva urie dhe kërkonte të drejtat e të dënuarve, duke u përballur me ndëshkime të vazhdueshme.
Uran Kostreci njihet si mjeshtër i sonetit, autor i një krijimtarie të thellë, me ironi të hollë dhe reflektim të fuqishëm. Ai është një figurë e demokracisë shqiptare dhe përballjes me diktaturën, që kontribuoi në ruajtjen e kujtesës deri në fund të jetës së tij.(12 korrik 2021)
