Telegram i ka kërkuar falje autoriteteve koreano-jugore për menaxhimin e materialeve pornografike "deepfake" të ndara përmes aplikacionit të tij, në mes të një epidemie të krimeve seksuale dixhitale në vend. Kjo vjen disa ditë pasi policia koreano-jugore njoftoi se kishte nisur një hetim ndaj Telegramit, duke e akuzuar për "ndihmë” në shpërndarjen e këtyre imazheve.
Në javët e fundit, një numër i madh dhomash bisedash (chat room) në Telegram - shumë prej tyre të drejtuara nga adoleshentë - u zbuluan se kishin krijuar "deepfake" me përmbajtje seksuale duke përdorur fotografi të manipuluara të vajzave të reja. Autoritetet thonë se Telegrami ka fshirë tashmë këto video nga platforma e tij.
Kriza e fundit e deepfake-ve ka ngjallur zemërim në Korenë e Jugut, pasi gazetarët zbuluan se policia po hetonte rrjete të pornografisë deepfake në dy prej universiteteve kryesore të vendit. Më vonë u zbulua se policia kishte marrë 118 raportime për këto video në pesë ditët e fundit. Shtatë të dyshuar, gjashtë prej të cilëve janë adoleshentë, janë marrë në pyetje nga policia gjatë javës së kaluar.
Grupet e bisedave ishin të lidhura me shkolla dhe universitete të ndryshme në të gjithë vendin, ndërsa shumë nga viktimat ishin studentë dhe mësues të njohur nga autorët e krimit. Në Korenë e Jugut, ata që shpallen fajtorë për krijimin e deepfake-ve me përmbajtje seksuale mund të dënohen me deri në pesë vjet burg dhe gjobiten deri në 50 milionë won (rreth 37,500 dollarë).
Këto zbulime në Korenë e Jugut pasojnë arrestimin e themeluesit të Telegramit, Pavel Durov, në Francë, me akuzat se aplikacioni ishte përdorur për trafikim fëmijësh, drogë dhe mashtrim. Durov është akuzuar zyrtarisht.
Javën e kaluar, presidenti i Koresë së Jugut, Yoon Suk Yeol, urdhëroi autoritetet që të "hetojnë dhe trajtojnë plotësisht këto krime seksuale dixhitale për t'i zhdukur ato". Aktivistët për të drejtat e grave kanë akuzuar autoritetet koreane për lejimin e abuzimeve seksuale përmes Telegramit. Në vitin 2019, u zbulua se një rrjet seksual kishte përdorur aplikacionin për të shantazhuar dhjetëra gra dhe fëmijë që të filmonin përmbajtje pornografike. Kreu i këtij rrjeti, Cho Ju-bin, atëherë 20 vjeç, u dënua me 42 vjet burg.
