Qëndrimet kontradiktore për çështjen e përjashtimit të Sali Berishës nga grupi parlamentar para 3 vitesh, "dashuria" për Bashën, largimi prej tij dhe rreshtimi pranë Rithemelimit e kanë bërë Agron Gjekmarkajn dukshëm një politikan pa shumë bosht dhe pa qëndrime koherente.
Së fundmi, i promovuar si drejtues politik i qarkut të Lezhës për zgjedhjet e ardhshme, Gjekmarkaj i ka ndezur të gjitha bateritë e servilizmit ndaj Sali Berishës. I ftuar mbrëmë në një studio televizive, ai paralajmëroi se do të përgatisë edhe një video me anë të së cilës do t’u kërkojë ndjesë demokratëve që nuk u bashkua që në fillim me Berishën: “Është koha për t’u kërkuar ndjesë secilit në mënyrë individuale dhe në mënyrë kolektive, sepse ndoshta ne politikanët e Tiranës nuk i kemi kuptuar mirë ose me vonesë qëndrimet e tyre, dhe të kërkosh ndjesë është gjëja më njerëzore.”
Rezultatet e zgjedhjeve në 2021 në qarkun e Lezhës nuk ishin ato që priteshin nga qarku i drejtuar edhe atëherë nga Gjekmarkaj. Me gjasë, e vetmja betejë që Agron Gjekmarkaj do të fitojë ndonjëherë në PD është ajo e servilizmit ndaj shefave, gjë që u intereson kaq pak demokratëve në vitin e 12-të të opozitës.
